Geguritan lan Tembang
Goncahing
Alam
Sunaring
hyang rawi anekseni
Sampyuhing
candra kartikaning tawang
Nora bisa
mratandhani
Gumlegering
bajra erawati
Samirana
ambrastha mayapada
Mahagiri
muntab anelasak wana
Samodra duka
njajah ngare
Alam tinitah
dening Gusti
Tanpa sangsi
kathahing pepati
Janma-janma
kang muspra
Anandang
karma priyangga
Akari raga
Jisim katon
gumlinting
Panjebar Semangat, Juli 2011
Sugeng Riyaya Fitri
Ing sadaya panjuru datan
Kepireng swara takbiran
Puji syukur maring pangeran
Gusti kang paring kasarasan
Para brayat andum sedekah
Arupi arta lan zakat fitrah
Mring sedherek kang nandang sisah
Amrih riyayan kanti bungah
Alaning rasa pangrasa
Tumrap sadayaning priyangga
Saha sami paring pangapura
Anom sepuh tanpa beda
Pindha kertas putih
Kadya ditya lahir malih
Mongkoging penggalih
Kanti berkah linuwih
Sugeng riyaya Fitri
Dinten kang edipeni
Nyuwun agunging pangaksami
Tumrap sadayaning pradondi
Majalah Embun, edisi Lebaran 2011
SUGENG HARIADI
Lamun sira emutaken
Alloh sampun paring pituduh
Nadyan sira kumawani
Gusti mboten paring sangsi
Inggih niku ganjaranipun
Tumrap sadaya priyantun
Ketingal hilal syawal ing angkasa
Ramadhan sampun purna
Edi endah sulistya ing rasa
Sesanti lan donga pamuji
Namung kagem pangwasa sawiji
Alloh, Gusti kang maha suci
Hariadi, sugeng rawuh riyaya suci
Atmaja sami sungkem
Rama biyung paring ngapunten
Iringan para kadang, tangga lan mitra
Andamel bungah
Dhapuking sadaya cecongkrah
Idul fitri, dinten
kang berkah
SESANTI WULAN SUCI
Rohning
candraning jalma
Arupa dosa
pindha hancala
Muhammad
pepeling umat
Ambrastha
sadaya awrat
Dhuh Gusti
kang akarya jagad
Haturira
kathahing pangaksami
Arawuhing
wulan suci
Ngayahi
jejibahan bekti
Malam Resepsi
Endahing candra kartika ing tawang
Swasana ratri kang saya tintrim
Samirana semribit klawan retno
Dhuh yayi…
Tan kwowo angudar penggalih
Tyas nira kang anandang branta
Tansah katungku esemu
Kang manise ngungkuli manu
Geg kemriyeg sarwa sigeg
Suka parisukaning malem resepsi
Sesandingan ing dampar kencana
Pindha ratu lan prameswari
Kadya mimi lan mintuna
Raden Kamajaya lan Dewi Ratih
Tyaraning galih linuwih
Carita Wengi
Sameko ing trah ratri
Kembang blimbing
Semayaning kasembadan
Mungguhing godhong
turi
Pethoking laladan
Gawang-gawang sirna
tan kemba
Janur gunung
kadingaren
Solah bawa tan kena
duga
Pancang uger-uger
lawang
Sing kadatan
Mung lamis tanpa amis
sawegko grimis
Tawang-tawang tan
peteng tanpa lintang
Kadhapuk malang
meganing mendhung
Uncating rasa
gara-gara ketiban pinjung
Suwung kasangsayan
Kaya driya tanpa
uruping rasa
Rasa-rasa jati
raganing jalma
Titianing jiwa
manteping ati
Ja dumeh den banjur
sumeh
Dhandhanggula
Aja pisan
sira anglakoni
Adigang
adigung adiguna
Jinaga ing
wicantene
Solah
miturut kalbu
Mratandhani
candraning becik
Bekti mring
yayah rena
Eling ing
linaku
Mujia marang
Pangeran
Kurmat
marang liyan kanthi edipeni
Pikantuk
kabecikan
Asmaradana
IMpen
sun sajroning ati
PIkantuk
jampi usada
ANandang
bingung seprene
NOra
gampang mendhem tresna
PItutur
kang ambrastha
TAn
ngrasuk sajroning kalbu
SARIra
janma kang setya
Dhandhanggula
Jahe wana ing
piranti aji
Poyang
payingan sun ngudi warta
Tuwuhing
mrica kecute
Eling mring
saunimu
Lung janur
timun ageng niki
Seda ing
lalabuhan
Juwet kutha
ayu
Gugurira den
prawira
Ora sangsi
den ngabekti mring nagari
Netepi
kewajiban
Kinanthi
RAtri nimas amitutur
DEN jatmika prapteng budi
EGUH pratikelaning tyas
PRAsasat angudi asih
SEkar semboja ing taman
TYAraning galih linuwih
Asmaradana
Dhuh gusti
ing dalu niki
Netra sun
tan bisa nendra
Bingung ati
ing seprene
Nandang
wuyung kang kapisan
Dhuh den
bagus sahaja
Sliramu
antebing kalbu
Engga sukma
pisah raga
Maskumambang
SUmerbak gandhaningrum sekar melati
PRIyagung ambudhi
YANwa gesang ing anyata
TAndha sun nandang branta
0 komentar: